«Qazaqtyń bolashaǵy – qazaq tilinde» dep qadap aıtqan Elbasynyń sózi qulaqtarda ǵana  qalyp qoıǵan joq, júrekterge de jazylyp qaldy, dep jazady Qamshy.kz aqparat agenttigi QR Ulttyq ulany «Batys» óńirlik qolbasshylyǵynyń baspasóz qyzmetine silteme jasaı otyryp.

 Til - ult baılyǵy. Ár ult óz tilin qadirleıdi, syılaıdy jáne bolashaqqa, keleshek urpaqqa amanat retinde jetkizip otyrady. Til - ǵasyrlar boıy ár ulttyń urpaqtan-urpaqqa berilý arqyly jınaqtaǵan baǵasy joq mádenı baılyǵy. Bizdiń otanymyzdyń tili – qazaq tili.

Qazir qazaq tili – qazaq halqynyń ulttyq tili. Bul jaıynda elbasymyz óz joldaýynda «Ulttyq til – qazaq ultynyń rýhanı, mádenı baılyǵyn urpaqtan-urpaqqa jetkizýshi qasıetti qural» dep kórsetken bolatyn.

Qazaqstan Respýblıkasynda Tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasyn iske asyrý aıasynda,  sondaı-aq, ana tilimizdiń mártebesin ósirý úshin jáne memlekettik tilimizdi qasterleýge, qurmetteýge tárbıeleý úshin Ulttyq ulany  áskerlerinde kóptegen is-sharalar ótkizilip keledi.

Osynyń aıǵaǵy retinde, Oraldaǵy  5517 áskerı bóliminde memlekettik tildi jetik meńgergen, ózge ult ókilderiniń áskerı  qyzmetkerleri arasynda «Memlekettik til - meniń tilim» baıqaýynyń  birinshi  kezeńi márege jetti.

Memlekettik tildiń qoldanys aıasyn keńeıtý maqsatynda uıymdastyrylǵan til dodasynda barlyǵy alty áskerı qyzmetshi baq synasyp, qazaq tilin qanshalyqty deńgeıde meńgergenin pash etti.

Baıqaýdy ádil qazylar alqasynyń tóraıymy: Qazaqstan Respýblıkasy Ulttyq ulany Bas qolbasshylyǵynyń «Qalqan» gazeti men «Búrkit» jýrnaly redaksıasynyń aǵa ofıseri zapastaǵy podpolkovnık Ryspaeva Botagóz Toıshybekqyzy ashyp, óz sózinde  «Elimizde memlekettik tildi damytýǵa Elbasy basa nazar aýdaryp keledi. Sonymen qatar, memleketimizde qazaq tilimen qatar resmı til retinde orys tilide paıdalanady. «Qazaqstannyń bolashaǵy-qazaq tilinde» dep beker aıtylmasa kerek. Sebebi qazaq tili ulttardy birlikke shaqyratyn til dep, qatysýshylarǵa sáttilik tiledi.

 Baıqaý  saıysy úsh kezenen turady jáne árbir kezeń alynǵan upaılar júıesi boıynsha baǵalandy. Alǵashqy «Bastaý» aınalymynda ár qatysýshy  ózi  jáne  qyzmet orny men ujymy jaıly áńgimelep,  kórermenge ózin etene tanystyryp ótti

Al, Órleý» dep atalǵan ekinshi aınalymda  saıyskerler qazaq halqynyń bı, sheshen, kósemderi, handary men batyrlarynyń rólderin somdap, sahnalyq qoıylymdar usyndy.

«Baıandaý» dep atalǵan úshinshi aınalymda baıqaýǵa qatysýshylar berilgen taqyryptar boıynsha slaıdtardy paıdalana otyryp, baıandama jasady.

Qazylar alqasy bul kezeńde saıyskerlerdiń resmı turǵyda durys sóıleı bilýi, sóıleý mádenıeti, mýzykamen kórkemdeýi, óz oıyn mánerlep, tolyq jetkize bilýine basa kóńil bólgenin aıta ketken jón.

Saıyskerler arasynan shyn myqtyny anyqtaý   úshin qaladan shaqyrylǵan ádil-qazylar quramynda Batys Qazaqstan oblystyq tilderdi damytý basqarmasynyń bas mamany Ganıeva Sveta Qadyrbaıqyzy, «Batys» óńirlik qolbasshylyǵynyń janyndaǵy Halyq mádenı ýnıversıtetiniń rektory Meńdyǵalıev Shámil Úmbetuly, Oral  qalalyq mádenı – aǵartý birlestigi dırektorynyń shyǵarmashylyq jumystar jónindegi orynbasary Nurǵalıeva Janar Amanǵalıqyzy, 5517 áskerı bóliminiń  áıelder keńesiniń tóraıymy, bólimniń shtab aýdarmashysy kishi serjant Hýsaınova Janna Jumabekqyzy boldy.

Sarapshylar alqasynyń qorytyndysy boıynsha, İ oryndy avtobronetanki múlki ortalyǵy bastyǵy  kapıtan Aleksandr Ershov jeńip aldy. İİ oryndy materıaldyq jáne tehnıkalyq qamtamasyz etý rotasy  baılanys vzvodynyń komandıri leıtenant Ivan Efremov ıelendi. Al úshinshi oryndy 2 atqyshtar rotasynyń baqylaýshylar vzvodynyń baqylaýshy mamany serjant Stanıslav Kotenkoǵa buıyrdy.

Jeńimpazdarǵa maqtaý qaǵazdary men syılyqtar tabystalyp, erekshe óner kórsetken qatysýshylarǵa alǵys hattar tabystaldy. Saıys sońy  Oral qalalyq jastar mádenı úıiniń ónerpazdarynyń konsertine ulasty. 

Al baıqaýda jeńiske jetken kapıtan Aleksandr Ershov  endi  áskerı bólimniń namysyn ózge ult áskerı qyzmetshileri arasynda ótetin «Batys» óńirlik qolbasshylyǵynyń 2-kezeńi baıqaýynda qorǵaıtyn bolady.